სადაზღვევო კომპანია „ჯიპიაი ჰოლდინგმა“ მედიის წარმომადგენლებს სამუშაო შეხვედრაზე სტიქიისგან დაზღვევისა და ბუნებრივი კატასტროფების მართვის პროგრამა გააცნო.
"ჯიპიაი ჰოლდინგის" დირექტორმა პაატა ლომაძემ ვორქშოპის ფარგლებში მედიის წარმომადგენლებს განუცხადა, რომ სადაზღვევო მექანიზმების განვითარებითა და გავრცელებით პროგრამა ხელს შეუწყობს ქვეყანაში რისკის მართვის მექანიზმის დანერგვას.
„ეს პროგრამა 3 აგვისტოდან დაიწყო, მაგრამ ჩვენ ინფორმაციის მიწოდების ხელშეწყობის მიზნით გადავწყვიტეთ, რომ უფრო დეტალურად განგვემარტა მედიის წარმომადგენლებისთვის ამ პროექტის შინაარსი, ის თუ როგორ უნდა მოხდეს ამ პროგრამით სარგებლობა და კიდევ ერთხელ დაგვედასტურებინა ჩვენი მზადყოფნა მოვემსახუროთ სრულიად საქართველოს“, - განაცხადა "ჯიპიაი ჰოლდინგის" დირექტორმა პაატა ლომაძემ. მედიასთან შეხვედრას.
კომპანიის წარმომადგენლებთან ერთად, სადაზღვევო კომპანიათა ასოციაციის გამგეობის თავმჯდომარე დევი ხეჩინაშვილი დაესწრო. მან ჟურნალისტებთან შეხვედრის დროს განმარტა, რომ აღნიშნული პორგრამა სადაზღვევო სფეროში წინ გადადგმული ნაბიჯია.
„ვფიქრობ, რომ ეს ძალიან საინტერესო პროექტია, რომელსაც მზღვეველი მძღოლებს სთავაზობს, ვისაც კიდევ არ სჯერათ, რომ ეს ყველაფერი მუშაობს და მათ უფასოდ აძლევს დაზღვევას კატასტროფული რისკებისგან", - განაცხადა ხეჩინაშვილმა.
2015 წლის აგვისტოდან "ჯიპიაი ჰოლდინგის" გადაწყვეტილებით, ყველა ავტომფლობელს საქართველოში შესაძლებლობა ექნება დარეგისტრირდეს "ჯიპიაის" სტიქიისგან დაზღვევის პროგრამაში და მიიღოს სტიქიისგან დაზღვევის პოლისი საჩუქრად. დაზღვეულ სტიქიურ უბედურებებს შორისაა - წყალდიდობა, მეწყერი, დიდთოვლობა, მიწისძვრა და ღვარცოფი.