„ერთიანი ნაციონალური მოძრაობის“ დეპუტატები შინაგან საქმეთა მინისტრის პოსტზე გოგა მღებრიშვილის კანდიდატურის წარდგენას აფასებენ. როგორც პარტიის საერთაშორისო მდივანმა, გიგა ბოკერიამ განაცხადა, ეს წარდგენა კიდევ ერთხელ გვახსენებს იმ მთავარ პრობლემას, რომელსაც ივანიშვილის მარიონეტებით დაკომპლექტებული სისტემა ჰქვია.
„უმნიშვნელოვანეს თანამდებობებზე ინიშნებიან ივანიშვილის პირადი მარიონეტები, რათა ემსახურონ მას და არა ხალხს და კანონს; ებრძოლონ მის პოლიტიკურ ოპონენტებს და არა კრიმინალს. მთავარი პრობლემა - ივანიშვილი უნდა ჩამოვაცილოთ მთავრობას და ქვეყანა უფსკრულისკენ მიმავალი გზიდან ვიხსნათ“, - განაცხადა გიგა ბოკერიამ.
ენმ-ს დეპუტატის, დავით დარჩიაშვილის თქმით კი, პრინციპული მნიშვნელობა თუ ვინ დაიკავებდა ამ პოზიცია, არ ჰქონდა, რადგან ნებისმიერ შემთხვევაში ის მისი შემრჩევის - ბიძინა ივანიშვილის პირადი მიზნების გამტარებელი იქნება და არა ქვეყნის ინტერესების.
„რაც შეეხება უშუალოდ მღებრიშვილს, ამ ადამიანმა თავი იმით დაგვამახსოვრა, რომ პოლკოვნიკი ფირცხალავა, კრიმინალებთან გადაიყვანა, რათა სწორედ მათი მეშვეობით მომხდარიყო ზეწოლა“, - განაცხადა დავით დარჩიაშვილმა.
