პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია სახალხო დამცველის ანგარიშის მოსმენის შემდეგ კომენტარს აკეთებს. როგორც მან „2030“-ის ეთერში განაცხადა, ომბუდსმენი ადამიანის უფლებების დაცვის კუთხით უდავო პროგრესს ხედავს.
„დღეს ჩვენ გვაქვს რეალობა, როდესაც სახალხო დამცველი აფასებს ადამიანების უფლებების დაცვის კუთხით ვითარებას და ამბობს, რომ არის უდავო პროგრესი და უკეთესი ვითარება. ბევრი მიმართულებით ჩვენ გვაქვს კარგი მაჩვენებელი“, - განაცხადა ბესელიამ.
ამასთანავე დეპუტატმა აღნიშნა, რომ ხელისუფლება ომბუდსმენის ანგარიშის მოსმენას დიდ მნიშვნელობას ანიჭებს და მის რეკომენდაციებს რეაგირების გარეშე არ ტოვებს.
„ჩვენ ვაჩვენეთ, რომ სახალხო დამცველის ანგარიშის მოსმენა - ეს არ არის ჩვეულებრივი მოვლენა და ჩვეულებრივი პოლიტიკური საკითხი დღის წესრიგში. ჩვენ ვაჩვენეთ დამოკიდებულებით და ფორმატით, რომ ეს არის განსაკუთრებული მოვლენა. შევიმუშავეთ სრულიად ახალი სტანდარტი. უკვე მე-3 წელია, რაც ჩვენი კომიტეტი და პარლამენტი უსმენს სახალხო დამცველს აღმასრულებელ ხელისუფლებასთან ერთად. <...> ჩვენ წელს მოვამზადეთ 87 რეკომენდაცია სახალხო დამცველის რეკომენდაციებზე დაყრდნობით, რომელიც ეხება ადამიანის უფლებების უფრო მაღალი სტანდარტის შემოღებას“, - აღნიშნა ეკა ბესელიამ.