ექსპერტი ეკონომიკის საკითხებში რომან გოცირიძე მთავრობის პირველ დიპლომატიურ წარმატებას აღიარებს. Facebook-ის საკუთარ გვერდზე გოცირიძე თურქმენეთის პრეზიდენტის საქართველოში ვიზიტს ეხმაურება.
,,ახალი მთავრობის პირველი დიპლომატიური წარმატება: საქართველოში არასდროს შემდგარა თურქმენეთის პრეზიდენტის ვიზიტი. ქვეყანა, რომელმაც შეძლო რუსეთისაგან დამოუკიდებელი პოლიტკის წარმოება და რომლის საფუძველი მისი გიგანტური ენერგორესურსები გახდა” - აცხადებს ექსპერტი.
თურქმენეთის დელეგაცია, პრეზიდენტის ხელმძღვანელობით, საქართველოს დღეს ეწვია. ვიზიტის ფარგლებში, საქართველოსა და თურქმენეთს შორის 7 ხელშეკრულება გაფორმდა. დოკუმენტები ორ ქვეყანას შორის სხვადასხვა სფეროში თანამაშრომლობას ითვალისწინებს.
ხელი მოეწერა ხელშეკრულებებს საქართველოსა და თურქმენეთის მეცნიერებათა აკადემიას შორის, საქართველოს ფინანსური მონიტორინგის სამსახურსა და თურქმენეთის ფინანსთა სამინისტროს შორის, საქართველოს სპორტისა და ახალგაზრდობის საქმეთა სამინისტროსა და თურქმენეთის სპორტის სახელმწიფო კომიტეტს შორის, საქართველოს განათლებისა და მეცნიერების სამინისტროსა და თურქმენეთის განათლების სამინისტროს შორის თანამშრომლობის შესახებ. ასევე გაფორმდა დოკუმენტები საქართველოსა და თურქეთის მთავრობებს შორის კულტურისა და ეკონომიკის სფეროში თანამშრომლობასთან დაკავშირებით.
გარდა ამისა, ავლაბრის სასახლეში საქართველოს პრეზიდენტმა გიორგი მარგველაშვილმა და თურქმენეთის პრეზიდენტმა გურბანგული ბერდიმუჰამედოვმა ხელი მოაწერეს ერთობლივ განცხადებასაც.
