დავით კეზერაშვილის ადვოკატის შოთა მინდელის შეფასებით, საქმე პოლიტიკურად მოტივირებულია და ეს დევნა არ სრულდება.
მთავარ პროკურატურაში, თავდაცვის ყოფილი მინისტრის დავით კეზერაშვილის ადვოკატს, მისი დაცვის ქვეშ მყოფის მიმართ, ბრალის დადგენილება გადასცეს, რის შემდეგაც მან ჟურნალისტებთან აღნიშნა, რომ ეს უკვე მეხუთე საქმეა.
„ბრალის დადგენილება ორგვერდიანია. რომ გითხრათ, რაიმე განსაკუთრებული წერია, გარდა იმისა, რაც მედიასაშუალებებით გაჟღერდა, ნამდვილად - არა. თვითონ ბრალს რაც შეეხება, მე როგორც იურისტი, გავეცანი ბრალის დადგენილებას და ეს უფრო მეტ შეკითხვას ბადებს, ვიდრე რაიმე შეკითხვას სცემს პასუხს”, - განაცხადა მინდელმა.
ადვოკატის თქმით, რაც ბრალის დადგენილებაში წერია, ცალსახად აჩენს ეჭვს.
„საქმე გვაქვს პოლიტიკურად მოტივირებულ დევნასთან კეზერაშვილის მიმართ და ეს დევნა, სამწუხაროდ, არ სრულდება და უკვე მეხუთე საქმეს მიაღწია“, - აღნიშნა მინდელმა.
ადვოკატის თქმით, ძირითადი მოწმეები არიან ბიზნესმენი თამაზ ნიჟარაძე და მისი ოჯახის წევრები. ადვოკატი ფიქრობს, რომ ეს არ არის საკმარისი იმისთვის, რომ პირის მიმართ ბრალი დამტკიცდეს.
გამოძალვის ბრალდებით, სისხლის სამართლის პასუხისგებაში საქართველოს თავდაცვის ყოფილი მინისტრი დღეს მიეცა.
საქმეზე გრძელდება გამოძიება საქართველოს სისხლის სამართლის კოდექსის 181-ე მუხლის მესამე ნაწილის ,,გ“ქვეპუნქტით, რაც სასჯელის სახედ და ზომად 4 დან 7 წლამდე თავისუფლების აღკვეთას ითვალისწინებს.