ბიზნესმენი თამაზ ნიჟარაძე პროკურატურის მიერ დავით კეზერაშვილისთვის ბრალის წარდგენის მიზეზს იხსენებს. მისი თქმით, ქონება იძულების წესით დაათმობინეს.
"2010 წლის 14 აგვისტოს კეზერაშვილმა დამიბარა თავისთან პიქსელის შენობაში. კატეგორიულად მოითხოვა ფოთის ნავსადგურში არსებული ჩემი კომპანიების წილების გადაფორმება. იმ მომენტში არ დავეთანხმე. იყო დაჭერისა და სიცოცხლის მოსპობის მუქარა. თან მეუბნებოდა, რომ ეს მისი, ადეიშვილის და მერაბიშვილის გადაწყვეტილება იყო. იმავე საღამოს სპეციალური ოპერატიული დეპარტმენტის თანამშრომლები ჩემთან სახლში, ეზოში, ეზოს გარეთ განლაგდნენ. არ მეძლეოდა თავისუფლად გადაადგილების საშუალება, საძინებელში რომ მივდიოდი, იქაც კი თანამშრომელი მეჯდა. მივხვდი, რომ მუქარა იყო რეალური და ამიტომ იძულებული გავხდი, გადამეფორმებინა ჩემი კომპანიების წილები მისთვის. ახლაც მის მფლობელობაშია", - აცხადებს ნიჟარაძე.
საქართველოს მთავარმა პროკურატურამ თავაცვის ყოფილ მინისტრ დავით კეზერაშვილს დღეს ახალი ბრალი წარუდგინა. უწყების განმარტებით, საქმე მოქალაქეთათვის ქონების იძულებით ჩამორთმევას ეხება.
