საიას თავმჯდომარე ანა ნაცვლიშვილი ,,ჯი-ეიჩ-ენთან” საუბარში აცხადებს, რომ მთავრობას, არ შეუძლია პრეზიდენტი იძულების წესით გამოიყვანოს და სადმე შეასახლოს. თუმცა ნაცვლიშვილის განმარტებით, თუ პროცესები ამ მიმართულებით განვითარდა ამ შემთხვევაში, უფრო მეტად დაზარალდება მთავრობა, ვიდრე პრეზიდენტის ინსტიტუტი.
,,ზოგადად სახელმწიფო ქონების განკარგავს ეკონომიკის სამინისტრო და სახელმწიფო ქონების მართვის სააგენტო, რომელიც ეკონომიკის სამინისტროს სიპია. Aამიტომ საკითხს სამართლებრივად რომ მიუდგეთ მთავრობა განკარგავს ნებისმიერი სახელმწიფო ქონების ბედს. ამ შემთხვევაში საქმე ეხება პრეზიდენტის საცხოვრებელ შენობას და საკითხი არის არა მხოლოდ სამართლებრივი, არამედ პოლიტიკურიც. შესაბამისად მხოლოდ სამართლებრივი ნორმების აპელირებით თემის გადაწყვეტა სწორი არ იქნება, გათვალისწინებული უნდა იყოს პოლიტიკური საკითხიც, სახელმწიფო ინსტიტუტებს შორის ურთიერთპატივისცემის გამოვლენა, კონსტრუქციულად მუშაობა და ა.შ. მთავრობას, რა თქმა უნდა, არ შეუძლია პრეზიდენტი იძულების წესით გამოსახლოს და სადმე შეასახლოს”, _განაცხადა ნაცვლიშვილმა.
კითხვაზე მთავრობა თუ იძულებს წესით მაინც გამოსახლებს პრეზიდენტს ავლაბრის რეზიდენციიდან იქნება ეს პრეზიდენტის ინსტიტუტის დისკრედიტაცია საიას თავმჯდომარე განმარტავს:
,, თუ მოვლენები განვითარდა ისე რომ პრეზიდენტი შეიძლება ძალით სადმე წავიდეს რაც ძალიან ცუდი იქნება, ამ შემთხვევაში მთავრობის მიმართ პატივისცემა უფრო შეირყევა. Aამიტომ აქ მხოლოდ პრეზიდენტის ინსტიტუტის მიმართ უპატივცემულობა არ დგას კითხვის ნიშნის ქვეშ, ვფიქრობ მთავრობის ავტორიტეტიც საფრთხის ქვეშ დადგება. ასეთი ტონით საუბარი ორ სახელმწიფო ინსტიტუტ შორის ორივე მხარეს აკნინებს”, -განაცხადა ,,ჯი-ეიჩ-ენთან” საუბარში ანა ნაცვლიშვილმა.