პრემიერი მთავრობის სხდომაზე პრეზიდენტის გუშინდელ განცხადებას გამოეხმაურა და მთავრობაში შექმნილ საბჭოებთან დაკავშირებით განმარტება გააკეთა. როგორც ღარიბაშვილმა განაცხადა მსგავსი საბჭოები საზღვარგარეთაც არსებობს და ეს საქართველოში ახალი გამოგონება არ არის.
"მინდა მოსახლეობას განვუმარტო რა მიზნით შევქმენით ეკონომიკური საბჭო, ეკონომიკური კაბინეტი, უსაფრთხოების საბჭო და კრიზისების მართვის საბჭო, მოსახლეობას განვუმარტო და არა პრეზიდენტს, მას რომ მოემართა კითხვით, ნებისმიერ დროს ჩვენ ამას მოვახერხებდით და მე მახსოვს, რომ ამ საკითხზე ჩვენ გვქონდა საუბარი,"-განაცხადა პრემიერმა.
ირაკლი ღარიბაშვილის თქმით, მსგავსი პრეცედენტები არსებობს ისრაელში, დიდი ბრიტანეთსა და აშშ-ში.
"ეს მოდელი ჩვენ გადმოვიღეთ ისრაელის სახელმწიფოსგან, სადაც ისრაელის პრემიერ-მინისტრს აქვს მსგავსი ტიპის აქტივობები, ბრიტანეთის პრემიერ-მინისტრს აქვს, ამერიკის პრეზიდენტს აქვს, ეკონომიკური საბჭოც არის, უსაფრთხოების საბჭოც არის, რომელიც ერთმანეთში არის საკმაოდ მჭიდროდ გადაჯჭვული, უსაფრთხოების საბჭოს მდივნის მოადგილე არის ამავე დროს ეკონომიკური საბჭოს მდივნის მოადგილეც და ამით რაიმე ახალი გამოგონება არ ყოფილა,"-განაცხადა ირაკლი ღარიბაშვილმა.