საგარეო საქმეთა მინისტრის მოადგილე, დავით კერესელიძე, კარასინი-აბაშიძის ფორმატში რკინიგზის აღდგენასთან დაკავშირებით საუბრის საქართველოს მხრიდან ინიცირებას გამორიცხავს და ამბობს, რომ ეს საკითხი არც ერთ დონეზე ოფიციალურად არ განხილულა.
მინისტრის მოადგილე ასევე ამბობს, რომ კარასინი-აბაშიძის ფორმატის გაუქმება დღის წესრიგში არ დგას.
ამის შესახებ განცხადება მან დღეს გამართულ ბრიფინგზე გააკეთა.
"ეს საუბრები არ მოდის საქართველოს მხრიდან და კარგად ესმის ყველას, რომელ მხარეს აწყობს, გააცოცხლოს ეს თემა. ერთი რამ შემიძლია, დარწმუნებით გითხრათ, რომ არც ერთ დონეზე, ყოველ შემთხვევაში საგარეო საქმეთა სამინისტრო გიდასტურებთ, რომ რაიმე დონის კონკრეტული განხილვა სარკინიგზო მიმოსვლის აღდგენაზე არ ყოფილა," - ამბობს კერესელიძე და დასძენს, რომ კარასინი-აბაშიძის ფორმატთან დაკავშირებით "პრემიერის განწყობაა და მისი სიტყვებია, რომ ამ ფორმატს, რომელმაც რაღაც გარკვეული წარმატებები მოიტანა, ჯერჯერობით არაფერი საფრთხე არ ემუქრება".
საგარეო საქმეთა სამინისტრომ ორი ახალი ელჩი დაასახელა. ნატო-ში ლევან დოლიძეს ალექსანდრე მაისურაძე შეცვლის. საბერძნეთში კი საქართველოს სრულუფლებიანი ელჩი იოსებ ნანობაშვილი იქნება. ეს პოსტი მას სემდეგ გახდა ვაკანტური, რაც დავით ბაქრაძე მინისტრთა კაბინეტში ევროინტეგრაციის მინისტრად დაინიშნა.