საქართველომ და ფიჯიმ ხელი მოაწერეს ერთობლივ კომუნიკეს დიპლომატიური და საკონსულო ურთიერთობების დამყარების შესახებ. ფიჯის მხრიდან ოქმს ხელი მოაწერა ფიჯის მუდმივმა წარმომადგენელმა პიტერ ტომსონმა, ხოლო საქართველოს მხრიდან - საქართველოს მუდმივმა წარმომადგენელმა ალექსანდრე ლომაიამ. ხელმოწერის ცერემონიალი შედგა ნიუ-იორკში, გაერთიანებული ერების ორგანიზაციასთან საქართველოს მუდმივ წარმომადგენლობაში.
კომუნიკეს თანახმად, ერთმანეთთან ურთიერთობებში მხარეები იხელმძღვანელებენ თანასწორობის, ეროვნული სუვერენიტეტის, ტერიტორიული მთლიანობისა და შიდა საქმეებში ჩაურევლობის პრინციპებით.
დიპლომატიური ურთიერთობების დამყარების შესახებ მხარეებმა ერთობლივი წერილით აცნობეს გაეროს გენერალურ მდივანს პან გი მუნს.
ფიჯი, აზია-წყნარიოკეანეს რეგიონის მეხუთე სახელმწიფოა, რომელთანაც საქართველომ 2010 წელს დაამყარა დიპლომატიური ურთიერთობები. მანამდე ანალოგიური დოკუმენტები გაფორმდა ბრუნეისთან, მალდივის რესპუბლიკასთან, მარშალის კუნძულებისა და სამოასთან.
შეგახსებთ, რომ სულ 2010 წელს საქართველომ 13 სახელმწიფოსთან დაამყარა დიპლომატიური ურთიერთობები. გარდა აზია-წყნარიოკეანეს რეგიონის სახელმწიფოებისა, ესენი არიან ლათინური ამერიკის (დომინიკის რესპუბლიკა, პარაგვაი, პერუ და სენტ-ლუჩია) და აფრიკის (ბოტსვანა, კაბო-ვერდე, კომორო და ლიბერია) სახელმწიფოები.
დღეისათვის, გაეროს 191 წევრი სახელმწიფოდან საქართველოს დიპლომატიური ურთიერთობები დამყარებული აქვს 135-თან.
მასალის გამოყენების პირობები