თბილისის საკრებულოსა და განათლების სამინისტროს ეგიდით ბუკლეტის ,,წასაკითხი წიგნები" პრეზენტაცია მოეწყო. ბუკლეტის პრეზენტაცია 23-ე საჯარო სკოლაში, დღეს გაიმართა. პრეზენტაციას საკრებულოს თავმჯდომარე ზაალ სამადაშვილი და განათლების მინისტრი დიმიტრი შაშკინი დაესწრნენ.
მწერალი ზაალ სამადაშვილი სკოლის მოსწავლეებს და მათ მშობლებს იმ წიგნების ჩამონათვალს სთავაზობს, რომელთა წაკითხვა მისი თქმით, აუცილებელია ყოველი ადამიანისთვის.
წიგნები სამი ასაკობრივი ჯგუფისთვისაა გათვალისწინებული - უმცროსი, საშუალო და უფროსი ასაკის ბავშვებისთვის. ეს სიები თბილისის საჯარო სკოლებში დარიგდება და სამადაშვილის განცხადებით, დიდ დახმარებას გაუწევს ყველა ოჯახს, ვისაც უნდა, რომ მათი ბავშვებისთვის წიგნის კითხვა არ იყოს თავსმოხვეული ვალდებულება.
შეგახსენებთ, რომ წასაკითხი წიგნების სამი მოკლე სია თანდართული წინასიტყვაობებით ზაალ სამადაშვილმა 2006 წლის გაზაფხულზე, 53-ე სკოლის დირექტორად ყოფნის პერიოდში მოამზადა, დღეს კი განათლების სამინისტროს დახმარებით, ამ წიგნების ჩამონათვალი ყველა საჯარო სკოლას გადაეცემა.
განათლების მინისტრის დიმიტრი შაშკინის განცხადებით, საკრებულოსა და განათლების სამინისტროს ერთობლივი პროექტი ყველა მოსწავლისთვის წიგნის სიყვარულს და ასაკის მიხედვით მოზარდებისთვის წიგნის სწორად მიწოდებას ისახავს მიზნად.
,,წასაკითხი წიგნების'' ბუკლეტი გაეროს ბავშვთა ფონდის (Uნიცეფ) მხარდაჭერით დაიბეჭდა.