ტელეკომპანია "მაესტროს" ახალ დირექტორად კახა ბექაური დაინიშნა. ამის შესახებ "მაესტროს" დამფუძნებელმა მამუკა ღლონტმა და მმართველი კომპანიის მფლობელმა ეროსი კიწმარიშვილმა დღეს გამართულ პრესკონფერენციაზე განაცხადეს.
მათი ინფორმაციით, ტელეკომპანიის რეორგანიზაციის პირველი ეტაპი თვე-ნახევარში დასრულდება და აპრილის ბოლოს სატელიტზე ახალი სამაუწყებლო ბადით გავა.
რეორგანიზაციის დასრულების შემდეგ "მაესტრო" საინფორმაციო არხი იქნება, რომლის პრაიმ-ტაიმში ორი საინფორმაციო გამოშვება გავა, ასევე "ნიუს თოქ-შოუების" ტიპის და საავტორო გადაცემების დაწყება იგეგმება.
როგორც ახალმა დირექტორმა განაცხადა, გადაცემებს ის ადამიანები გაუზღვებიან, რომელთაც ჟურნალისტის ღირსება არ შეულახავთ.
ამასთან, ეროსი კიწმარიშვილმა აღნიშნა, რომ ტელეკომპანია მოგებული გრანტებითა და მმართველი კომპანიის ფინანსებით მაუწყებლობს.
"ველოდებით კიდევ რამდენიმე გრანტს. მომავალში კი, ვიმედოვნებთ, რომ სარეკლამო დროის გაყიდვით შევძლებთ ტელეკომპანიის შენახვას. "მაესტროში" არ არის და არც შეიძლება იყოს რომელიმე პოლიტიკური პარტიის ფინანსები. მათ კანონით დადგენილი წესის შესაბამისად სარეკლამო დროის ყიდვა შეუძლიათ", - განაცხადა კიწმარიშვილმა.
